दिग्रस : सेवानिवृत्त तारासिंग रामचंद्र राठोड, जे सेवा निवृत्त झाल्यानंतरही आपल्या हक्काची रक्कम मिळवण्यासाठी संघर्ष करत आहेत, यांनी महाराष्ट्राचे मुख्यमंत्री मा. देवेंद्र फडणवीस यांना निवेदन सादर केले आहे. त्यांनी सरकारी यंत्रणेकडून होत असलेल्या अन्यायाबाबत तक्रार केली असून, भूमिअभिलेख कार्यालय, दारव्हा येथील अधिकाऱ्यांच्या गैरव्यवस्थापनामुळे व हलगर्जीपणामुळे त्यांना मोठा त्रास सहन करावा लागत आहे.
मुख्यमंत्र्यांना दिलेल्या मागण्या :
- तत्काळ त्यांच्या हक्काची रक्कम मंजूर करण्यात यावी.
- भूमिअभिलेख कार्यालय, दारव्हा येथील अधिकाऱ्यांच्या हलगर्जीपणाची चौकशी करण्यात यावी.
- त्यांच्या अर्जावर निश्चित कालमर्यादेत कार्यवाही करण्याची हमी देण्यात यावी.
- भविष्यात अशा अन्य सेवानिवृत्त कर्मचाऱ्यांना होणाऱ्या त्रासाला प्रतिबंध करण्यासाठी योग्य उपाययोजना करण्यात याव्यात.
राठोड यांनी स्पष्ट इशारा दिला आहे की, जर ३० दिवसांत त्यांच्या प्रकरणाचा निपटारा झाला नाही, तर ते उपोषणाला बसतील आणि या विलंबासाठी संबंधित अधिकाऱ्यांना जबाबदार धरण्यात येईल.
दारव्हा भूमिअभिलेख कार्यालयाच्या हलगर्जीपणामुळे त्रास
राठोड यांनी अमरावती आणि यवतमाळ जिल्हा भूमिअभिलेख कार्यालयात अर्ज सादर केला होता, मात्र वारंवार पाठपुरावा करूनही सकारात्मक प्रतिसाद मिळालेला नाही. विशेषतः दारव्हा भूमिअभिलेख कार्यालयाच्या अधिकाऱ्यांनी प्रकरण दिरंगाईने हाताळल्यामुळे त्यांना आर्थिक, मानसिक आणि शारीरिक त्रास सहन करावा लागत आहे.
मुख्यमंत्री फडणवीस यांना दिलेल्या निवेदनात त्यांनी प्रशासनाला ताकीद दिली आहे की, जर तातडीने योग्य कार्यवाही झाली नाही, तर लोकआंदोलन आणि न्यायालयीन लढाईचा मार्ग अवलंबला जाईल.
0 Comments